‘அனைத்து தவறும் என் மீது தான் ' - தவறை உணர்ந்த கௌதம்...!

அஜித் - கௌதம் - ஹாரிஸ்! பவர்-ஃபுல் கூட்டணி?

கௌதம் மேனனால் ஹாரிஸ் ஜெயராஜ் வளர்ந்தாரா? ஹாரிஸ் ஜெயராஜால் கௌதம் மேனனால் வளர்ந்தாரா? என்ற ஆராய்ச்சிக்கெல்லாம் போகாமல், அவர்கள் இருவரும் சேர்ந்து இருந்தாலே போதும் என்று ரசிகர்கள் எண்ணத்தக்க வகையில் சமகாலத்தில் வளர்ந்தவர்கள் ஹாரிஸும் கௌதமும்.


 ’மின்னலே’ திரைப்படத்தில் துவங்கிய இவர்கள் நட்பு வாரணம் ஆயிரம் திரைப்படம் வரை, கிட்டத்தட்ட 8 ஆண்டுகள் நல்லவிதத்தில் இருந்தது.


 விண்ணைத்தாண்டி வருவாயா திரைப்படத்தில் ஹாரிஸிடம் சொல்லமலே கௌதம் ஏ.ஆர்.ரஹ்மானுடன் இணைந்தபிறகு அந்த நட்பு தொடரவில்லை. ‘என் மீது தான் தவறு என்று கௌதம் பகிரங்கமாக ஒப்புக்கொண்டாலும் ஹாரிஸ்-கௌதம் கூட்டணி மீண்டும் இணையாமல் போனது.


ஹாரிஸ் இல்லாமல் கௌதம் படங்களின் பாடல்கள் தோல்வியடைந்தன என்று சொல்லமுடியாத விதத்தில் ஏ.ஆர்.ரஹ்மான், இளையராஜா என்று தான் கௌதமின் கூட்டணி இருந்தது என்றாலும் ஹாரிஸ்-கௌதம் கூட்டணியில் உருவான பாடல்களின் தாக்கம் மற்றவர்களின் பாடல்களில் இல்லை என்பதே ரசிகர்களின் கருத்து.


 தற்போது அஜித்-கௌதம் இணைந்திருக்கும் திரைப்படத்தில் ஹாரிஸ் ஜெயராஜ் இசையமைக்கிறார் என்ற தகவல் வெளியாகியிருக்கிறது. முன்பு ஒருமுறை அளித்த பேட்டியில் ‘அனைத்து தவறும் என் மீது தான். ஹாரிஸ் என்னுடன் இணைந்து பணியாற்ற சம்மதம் தெரிவித்தால் எனக்கும் சம்மதம் தான். ஹாரிஸுடன் மீண்டும் இணைவதில் நான் மகிழ்ச்சியடைவேன்” என்று கூறியிருந்தார்.


அதுமட்டுமில்லாமல் அஜித்-கௌதம்-ஹாரிஸ் ஆகியோரின் கூட்டணி புதிதாக திட்டமிடப்பட்ட கூட்டணியல்ல. கௌதம்மிடம் இதற்கான திட்டம் எப்போதோ இருந்தது. ஆனால் சில காரணங்களால் செயல்படுத்தமுடியாமல் போய்விட்டது என்று கோடம்பாக்கத்தில் பேசப்படுகிறது.