ஈராஸ் இன்டர்நேஷனல், மீடியா ஒன் குளோபல் என்டர்டெயின்மென்ட் தயாரிக்கும் படம், ‘கோச்சடையான்’. ரஜினிகாந்த், தீபிகா படுகோன் ஜோடி. இசை, ஏ.ஆர்.ரகுமான். பாடல்கள்:
வாலி, வைரமுத்து. கதை, திரைக்கதை, வசனம்: கே.எஸ்.ரவிகுமார். இயக்கம், சவுந்தர்யா ரஜினிகாந்த் அஸ்வின். இப்படத்தின் ஆடியோ சி.டி மற்றும் டிரைலர் வெளியீட்டு விழா சென்னையில் நேற்று நடந்தது. தமிழ் மற்றும் தெலுங்கு ஆடியோ சி.டியை ஷாருக்கான் வெளியிட்டார். ‘கோச்சடையான்’ கார்பன் மொபைல் ஸ்பெஷல் எடிசனை ரஜினிகாந்த் வெளியிட்டார்.
பிறகு அவர் பேசியதாவது:
ராஜா, ராணி கதையில் நடிக்கவில்லையே என்ற வருத்தம் இருந்தது. 20 வருடமாக என் மனதில் ஓடிக்கொண்டிருந்த அந்த எண்ணம்தான் ‘ராணா’ படம் உருவாக காரணமாக அமைந்தது. கே.எஸ்.ரவிகுமார் இயக்கினார். முதல்நாள் ஷூட்டிங்கில் எனக்கு உடல்நிலை பாதித்தது. சிங்கப்பூர் சென்று சிகிச்சை பெற்று திரும்பினேன். பிறகு அந்த படத்தில் நடிக்க நினைத்தபோது,
என் உடல்நிலை ஒத்துழைக்காத நிலை ஏற்பட்டது. அப்போது முரளி மனோகர் என்னை அணுகி, ‘கோச்சடையான்’ கதையை ரவிகுமாரிடம் கேட்க சொன்னார். கேட்டேன், பிடித்திருந்தது. இந்த படத்தை சவுந்தர்யா 3டி மோசன் கேப்சர் தொழில்நுட்பத்தில் உருவாக்கலாம் என்றார். ‘அந்த டெக்னாலஜி பற்றி எனக்கு தெரியாது. உன்னால் முடியுமா?’ என்றேன். ‘முடியும்’ என்றார். தமிழக மக்கள் என் மீது அதிக அன்பு வைத்திருக்கிறார்கள்.
அவர்களுக்கு ஏதாவது பெரிதாக செய்ய வேண்டும் என்று நினைத்தேன். அதை ‘கோச்சடையான்’ படமாக கொடுத்திருக்கிறேன். இதில் உழைத்தவர்கள் பட்ட கஷ்டத்தை வாயால் சொல்ல முடியாது.
படத்தை நான் பார்த்து விட்டேன். நன்றாக இருக்கிறது. ரசிகர்களுக்கு மிகவும் பிடிக்கும். எஸ்.பி.முத்துராமன் சொன்னது போல், இந்த படத்தின் வெற்றிவிழாவை பெரிய அளவில் நடத்தி, எல்லா ரசிகர்களையும் அழைத்துப் பேசுவேன். இவ்வாறு ரஜினிகாந்த் பேசினார்.
ஷாருக்கான் பேசுகையில், ‘எப்போது தமிழ்நாட்டுக்கு வந்தாலும் ரசிகர்கள் என்மீது அன்பு மழை பொழிகிறார்கள். அதற்கு நன்றி’ என்றார். தீபிகா படுகோன் பேசுகையில், ‘இந்த படத்தில் நடித்தது எனக்கு புது அனுபவம். ரசிகர்களுக்கும் புது அனுபவமாக இருக்கும்’ என்றார்.
விழாவில் கே.பாலசந்தர், ஏ.வி.எம்.சரவணன், எஸ்.பி.முத்துராமன், கே.எஸ்.ரவிகுமார், ஷங்கர், ஏ.ஆர்.ரகுமான், வைரமுத்து, சரத்குமார், ஜாக்கி ஷெராப், பிரபு, தனுஷ், டாக்டர் முரளி மனோகர், லதா ரஜினிகாந்த், ஐஸ்வர்யா தனுஷ், ஷோபனா, கலைப்புலி எஸ்.தாணு உட்பட பலர் கலந்துகொண்டனர்.
0 comments:
Post a Comment